Exo 37 | BJR | STEP | Beesareerafa narí dadaaqí márusa faqa akasia sáqari marasee minánnai moodáanaki kíra bookisa áuqiqau. Miná kísaaqa 110 centimetres áuqiqau. Miná qúsándanai faqa miná kúradarafa faqa amana amana kái 66 centimetres amana áuqiqau.

Exodus 37

Ínnee moodáanaki kíra ufa mári bóokisana áuquaqa.

(Rafúdoo 25:10-22)

1 Beesareerafa narí dadaaqí márusa faqa akasia sáqari marasee minánnai moodáanaki kíra bookisa áuqiqau. Miná kísaaqa 110 centimetres áuqiqau. Miná qúsándanai faqa miná kúradarafa faqa amana amana kái 66 centimetres amana áuqiqau. 2 Misá ámiqira koora marasée túrimmásoofanoo ausirúmafufaqa minánnái kai bookísa adisáa faqa aundurái faqa ititaqau. Mi bookísana áfaimau kóorannai ámatookika másee rafáaqafiqau. 3 Misá kóorannai qaindúsi fandínnana ámaaqa qaara faqa qaara faqa 4 áuqusee aiqáma áikusaa quqáqau. Dínni áikusaa qaara qánda dínni áikusaa qaara qánda quqáqau. 4 Misá akasia sáqari qaindúsi fandínna qanda kóora túrimmandee ausirúma qumáree minánnai kukúqiqau. 5 Kukúqammaseeqa dínni dínni ámaaqa áuquqoonaki áusiqau.

6 Bookísa afu faqa kóorannai kai áuqiqau. Miná kísaaqa 110 centimetres amana márinau, miná qúsa 66 centimetres amana márinau. 7 Misá kóora túrimáseenoo bookísa áfu áuquseeqa minánnai kai dínni dínni qangiroo qaaraqánda nimana áuqiqau. 8 Afu dínni átinni moó qángiroo amana áuqusee dínni moó qangiroo amana áuqiqau. Áfu faqa mi qangiroo qandá nimana faqa moodáa kóorannai kaí áuqiqau. 9 Mi qangiroo qandá bookísa áfusaa quqásoofaqa nóori narí qáfee narí qáfee iqá máriqau. Miqandá níqoosa uqéerasoofanoo bookísa áfusaa ititánoo márinau.

Misá áiku faqaa teeboora áuqusee Yáaweena ámiraree qu féemuna miqóo quqáqau.

(Rafúdoo 25:23-30)

10 Beesareeráfa akasia sáqarinnoo teebóora áuqinau. Miná kísaaqa 88 centimetres márinau. Miná qúsa 44 centimetres márinau. Miná kúradarafa 66 centimetres márinau. 11 Mifá ámiqira kóora marasée túrimmasoofanoo ausirúma fufanoo minánnai teebóora rafáaqa fúsee kafáa moonnái teebóora átiqara fíqu fíqumma rafáaqa finau. 12 Mifá teebóora átiqara fíqu fíqumma 8 centimetres amana ititásee miná áfaimau kóorannai rafáaqa fiqau. 13 Mifá kóorannai qaindúsifandínnana ámaaqa 4 áuqusee teebóora aiqáma áiku námusaa quqánau. 14 Teebóora áfai ameemaanandanai qaindúsirana amaaqa áuqinau. Mifa mi anaanúsa áfai ameemaanai ququseenoo atukaránau. Atukarasáinaqa aindúsira sáqari minakí áusúaqeera atukuránau. 15 Mifá akasia sáqari qaindúsifandinna qanda kóorannai kukúqinau. 16 Mifá ámiqira kóorannái kai teebóorasaa quqéefandínna pírita kaafáusa faqa kísaaqa káafauqa faqa Yáaweena ámifandínna úainna adíara pírita uqnaurírana faqa áuqiqau.

Misa qóoma qumbífandinna aikána áuqiqau.

(Rafúdoo 25:31-40)

17 Misá qóoma qumbira áika ámiqira kóorannai auqíqau. Misá kóora túriiseeqa minánnai kai qooma qumbíra aika óosana faqa adaká faqa ásaanauqa faqa áuqiqau. Mi asaanáusa saa mi kooránannai kai taatuqée áqama áfufeenáari márindee máseeqa káafara foorá afisú ámaqáqau. 18 Mi qóoma aikáusa qísauku dínni taikásee dínni áni moodáa marasée 6 márinau. Dínni qaaramoó dínni qaaramoó márinau. 19 Aiqáma mi asaana namúna átimáu kóorannai taatuqée áqama áfufeenáari márindee másee afaaqa áuqiqau. Mi afufeenaariráfa téeqnóorina aqamara foorá márufaqa mi asaana namúna sáa áuqiqau. 20 Miná adaká sáa qaara faqa qaara faqa 4 saa taatuqée áqama téeqnóorina aqamara foorá áuqiqau. 21 Moodáa aqama indaarúqaa ásaana qara ámeemaanai márinau, kafaa miná múrufi ásaana qara ámeemaanai moó áqama márinau. Kafaa miná múrufi ásaana qara ámeemaanai moó márinau. 22 Ámiqira koora turiiseeqa minánnai kai qóoma óosana faqa ásaanauqa faqa áfufeenaarirana faqa áuqiqau.

23 Misá ámiqira koorannai qóomauqa dínni taikásee dínni ani qaara marasée 7 qóoma áuquseeqa mi asaanáusa átimau quqáqau. Miná úfaqaa faqa dandá afaqée máriana faqa áuqiqau. 24 Qóoma quqára áika ámiqira kóorannai 34 kilogram umaara amana kái marasée áuqiqau.

Ámiqira úndimari munána suqára qáinda áuqiqau.

(Rafúdoo 30:1-5)

25 Misá akasia sáqari marasée ámiqira afundí mari ida munána áreefandínna aidarána áuqiqau. Mi aidaráfa dínni dínni amana kái márinau. Miná kísaaqandanai 45 centimetres márinau. Miná qúsandanai miqí kai ínoo 45 centimetres márinau. Maqásaa qari óoru fírafa 90 centimetres márinau. Miná qára qaara faqa qaara faqa ati moodáa sáqarinnái kai burimakáu aanairá foorá auqiqau. 26 Miná áfu faqa aanai fooqáana faqa ataaqée qara faqa ámiqira kóorannái kai rafáaqafúsee kóorannai miná fíqu fíqumma áuqiqau. 27 Kóorannai qaaraqánda anaanu áuqusee dínni moó dínni moó quqásoofanóo qaindúsifandína sáqarina atukarammá qumáranau. 28 Mi qaindusira saqari qandá akasia sáqarinnai áuqusee kóorannai rafáaqafiqau. 29 Misá náaquqara fadameenna Yáaweenaindi fee qímasee nikiiqa ámoondunna adíee fandínnana áuqiqau. Idáki quqásaafanoo adíafaa íra úndimari pauraqára ámiqira úndimari fadameennará foorá áuqiqau.